ШУТИС БАС-ийн 2016-2017 оны хичээлийн жилийн намрын улирлын төгсөлт                                                                 болж өнгөрлөө.

ШУТИС, Барилга Архитетурын Сургуулийн 2016-2017 оны хичээлийн жилийн намрын улирлын төгсөлт 2017 оны 1 дүгээр сарын 20-ны өдөр боллоо. Энэ удаагийн төгсөлтөөр доктор 2, магистр 24, бакалавр 222, дипломын зэрэгтэй 5 нийт 253 оюутан үүнээс онцлох дипломтой 5 оюутан төгсөв.  

Төгсөлтийн ёслолын ажиллагааг нээж БАС-ийн захирал Э.Нинжгарав төгсөгчдөд хандан амжилт хүсч, цаашид төгссөн сургуультайгаа байнга холбоотой байж магистр, докторт суралцах, улс эх орныхоо хөгжилд бодитой хувь нэмэр оруулахад иргэн бүр хичээн ажиллахаас гадна инженер болон төгсөж буй та бүхнээс ихээхэн үүрэг хариуцлага, инженерийн шийдэл хэрэгтэй гэдгийг хэлсэн үгэндээ цохон тэмдэглэв. Улаанбаатар хот маань агаар, хөрс, усны бохирдолтой байгаа өнөөгийн нөхцөлд төгсөгчид та бүхэн хүрээлэн буй орчиндоо ээлтэй,  инженерийн цогц шийдэлтэй, монголын архитектурын өвөрмөц шийдлийг тусгасан барилга байгууламжийг барьж босгоход ихээхэн үүрэг хариуцлагатай оролцоно гэдгийг захиж хэллээ. Мөн түүнчлэн ШУТИС-ийн боловсрол эрхэлсэн проректор Х.Энхжаргал төгсөгчдөд хандан үг хэллээ. Хэлсэн үгэндээ ШУТИС-ийн хөдөлмөр зүтгэлийг төр засаг өндөөр үнэлэн хөдөлмөрийн гавъяаны улаан тугийн одонгоор шагнагдасныг цохон тэмдэглээд төгсөгчиддөө баяр хүргэлээ.  

 Ийнхүү төгсөлтийн ёслолын ажиллагаанд ШУТИС-ийн боловсрол эрхэлсэн проректор Х.Энхжаргал, БАС-ийн захирал Э.Нинжгарав, дэд захирал Ж.Азжаргал, эрдэмтэн нарийн бичгийн дарга Ц.Оюунцацрал, архитектурын салбарын эрхлэгч И.Гончигбат, хүрээлэн буй орчны инженерийн салбарын эрхлэгч Б.Болд, Барилгын инженерийн салбарын профессор Я.Дүйнхэржав, Хүрээлэн буй орчны нженерийн салбарын дэд профессор С.Чулуунхуяг, Хүрээлэн буй орчны нженерийн салбарын дэд профессор Р.Болормаа нар оролцож, оюутнуудад диплом гардуулав. Барилгын инженерийн салбарын профессор Я.Дүйнхэржав төгсөгчиддөө хандан сургааль үг хэллээ.

Энэ жилийн намрын улирлын ШУТИС-ийн “Шилдэг төгсөгч” -өөр БАС-ийн Архитектурын мэргэжлээр төгсөгч А.Ууганчимэг шалгарч төгсөгчдийг төлөөлөн  эрдэмтэн багш, профессоруудад хандан баяр, талархлын үгээ хэллээ. Энэ хичээлийн жилийн намрын улирлын төгсөгчдөөс Иргэний ба үйлдвэрийн барилгын мэргэжлээр төгсөгч Б.Цагаандарь, Автозамын барилгын мэргэжлээр төгсөгч Б.Ням-Очир нар БАС-ийн “Захирлын нэрэмжит” шагналаар шагнагдав. 

Мөн Архитектурын мэргэжлээр төгсөгч  А.Ууганчимэг, Архитектурын мэргэжлээр төгсөгч  Г.Гэрэл, Иргэний ба үйлдвэрийн барилгын мэргэжлээр төгсөгч  Б.Цагаандарь, Иргэний ба үйлдвэрийн барилгын мэргэжлээр төгсөгч  Ц.Баярмагнай, Автозамын барилгын мэргэжлээр төгсөгч  Б.Ундрам нар нь онцлох диплом гардан авч төгсөв.  

Ийнхүү дипломоо гардан авсан оюутан залуучууд маань тангараг өргөснөөр төгсөлтийн ёслолын ажиллагаа өндөрлөлөө.

                                                                                                                                Мэдээг бэлтгэсэн Э.Бумбаяр